Saida Mirziyoyeva Marokashda “Fashion Trust Arabia” tadbirida ishtirok etdi.
Saida Mirziyoyeva Shayx Al-Mayassa bint Hamad bin Xalifa Ol Soniy hazrati oliyalarining taklifiga binoan Marokashda “Fashion Trust Arabia” mukofotlari marosimida ishtirok etdi. Ushbu tadbir Yaqin Sharq mamlakatlaridan kelgan yosh dizaynerlarni qoʻllab-quvvatlashga qaratilgan.
“Fashion Trust Arabia” mintaqada moda biznesini rivojlantirish va yangi talantlar uchun imkoniyatlar yaratishga qaratilgan tashabbusdir. Marosim davomida ishtirokchilar moda sanoatining yetakchi vakillari bilan uchrashish va eng kreativ dizaynerlarga mukofotlar topshirilishini guvohi boʻlish imkoniyatiga ega boʻldilar.
Yosh ijodkorlarga alohida eʼtibor qaratildi, ular oʻzlarining noyob ishlarini taqdim etishdi, bu esa moda sohasida madaniy almashinuv va hamkorlikni rivojlantirishga hissa qoʻshdi.
Saida Mirziyoyeva Marokash malikasi Lalla Hasnaga mehmondoʻstligi uchun, Shayx Ol-Mayassa bint Hamad bin Xalifa Ol Soniyga esa unutilmas taassurotlarga boy ushbu kunlarni baham koʻrgani uchun samimiy minnatdorligini bildirdi.