“Innovatsion ayiqcha” – Xonadoningiz uchun chiroyli bezak

“Karantinda ochilgan isteʼdodlar” tanlovimizning “hunarmand” nominatsiyasi boʼyicha gʼoliblikni qoʼlga kiritgan ishtirokchimiz Gʼofurova Munirabonuning “munchoqli ayiqchalari” koʼp kanalimiz aʼzolarining eʼtiborini tortdi.

Karantin davrida tinib-tinchimas 11 yoshli qahramonimiz koʼp qizlarga vaqtlarini unumli oʼtkazishi uchun videolavhalar yordamida hamda onlayn tarzda biserdan ayiqchalar yasashni namoyish etdi. Bu turdagi ayiqchalar hali hech qaerda yasalmagan edi. Innovatsion loyihalari asosida turli koʼrik-tanlovlarda munosib oʼrinlarni egallab kelayotgan ustabilarmon qizimiz juda koʼp yoshlarga va tengdoshlariga haqiqiy ibrat boʼlib kelmoqda. Jumladan, “Oʼzbekiston ayollarining 100 ta eng yaxshi innovatsion loyihasi” III Respublikatanlovining eng yosh ishtirokchisi sifatida “Iqtidorli qizning istiqbolli innovatsion gʼoyasi” tanlov nominatsiyasi boʼyicha munosib taqdirlangan. Hozirgi kunda Munirabonu oʼzi oʼqiyotgan maktab oʼquvchilariga, Toshkent shahar xotin-qizlar tadbirkorlik markazi hamda mahallasidagi qizlarga oʼz hunarini oʼrgatmokda. Uning 30 dan ziyod shogirdlari ham bor.

MUNChOQLI АYIQChАLАR – TOZА MАHSULOT

Zamona ruhi bilan birga dadil odimlayotgan Munirabonu oʼz fikrlarini quyidagicha izohladi:

– Ishlab chiqargan mahsulotlarimning inson sogʼligʼiga nojoʼya taʼsiri yoʼq. Eng muhimi ekologik toza. Oʼzingizga maʼlumki, yumshoq oʼyinchoqlarga tezda chang oʼtiradi va bu holat allergik taʼsirga beriluvchan bolalar uchun ancha zararli ekanligini ham yaxshi bilasiz. Biroq biser yordamida ishlov berilgan oʼyinchoqlarning afzalligi shundaki, ularni artib-tozalab, soʼng oʼyinni bemalol davom ettirishingiz mumkin.

Men ham yoshligimda yumshoq ayiqchalarni oʼynashni juda yoqtirardim. Lekin ularni oʼtirgʼizib qoʼyishda juda qiynalganlarim esimda. Bu muammoni hal etish oʼsha onlarda tugʼilgan edi. Mahsulotlarimni yasashda penaplastdan shakl kesib olib, maxsus yelim yordamida ularni biriktirib olaman va shundan soʼng munchoqlar bilan bezataman”.

INTILGАNGА TOLE YOR!

Chindan ham, “intilganga tole yor!” Muniraxon oʼzi yaratgan oʼyinchoq ayiqcha bilan Indoneziyada 2019 yil 16-20 oktyabrь kunlari boʼlib oʼtgan festivalda ishtirok etib, faxrli oʼrinlarni egalladi. Shuningdek, Moskva shahrida 2019 yil 3-4 noyabrь kunlari boʼlib oʼtgan“Rukami jenщinы” (“Аyollarning qoʼl mehnati”) koʼrik -tanlovida 2-oʼrin sohibasi boʼldi.

Quvonarlisi, Munirabonu yaratgan 300 ta oʼyinchoq ayiqchalar 2020 yil yanvarь oyida Аvstraliya davlatiga eksport ham qilindi.

Qoʼli gul qahramonimizga kelgusi ishlarida ulkan zafarlar tilab qolamiz!

 

Sevara АBDULLАEVА

Milliy liboslar – xalqimiz ko’rki

“Karantinda ochilgan isteʼdodlar” tanlovining shartiga koʼra, 1-, 2- va 3-oʼrin sohibi va sohibalarihaqida indep.uz sayti hamda“XXI asr texnologiyalari” telegram kanalida maqolalar yoritilishi aytilgandi. Vaʼdaga muvofiq, yana bir qobiliyatli ishtirokchimiz – “rassomchilik” nominatsiyasi boʼyicha gʼoliblikni qoʼlgan kiritgan P. BENKOV nomidagi respublika ixtisoslashtirilgan rassomlik maktabining 10-sinf oʼquvchisi Gʼanieva Eʼzozaxon.

Eʼzozaxon tanlovga oʼzbek milliy libosining zamonaviy koʼrinishi aks ettirilgan suratlari bilan ishtirok etdi. Toʼgʼrisi, yosh boʼlishiga qaramay oʼz ishiga usta dizaynerlar singari mahorat bilan yondashgani bizni hayratga soldi.

– Milliy kiyimlarimiz tikilishining oʼziga xosligi va jimjimador naqshlari bilan ajralib turadi, – deydi Eʼzozaxon. – Shu bois tabiiy va serjilo adras va atlas matolardan hashamdor liboslarni toʼplashga, sharqona nazokatni suratlarimda aks ettirishga harakat qilaman.

Milliy kiyim masalasiga toʼxtaladigan boʼlsak, qadimdan inson qaysi millatga mansub ekanligi, birinchi navbatda, uning kiyimiga qarab aniqlangan. Har bir millat oʼziga xos kiyinish madaniyatiga ega. Bizning milliy kiyimlarimiz dunyoning qay burchagida boʼlmasin, har qanday millat vakillarining havasini keltirib, oʼziga mahliyo etadi. Аfsuski, eski tuzum davrida milliy liboslarimizga boʼlgan munosabat ancha susaygan edi.

Hattogoʼzal va betakor, nafis va serjilo atlas matomizning havo oʼtkazmasligini bahona qilib, oʼzlaricha eʼtiroz bildirganlar ham bor edi. Yillar oʼtishi bilan zamonlar ham oʼzgardi. Har bir sohaga texnologiyalar yordamga kirib keldi. Endilikda oʼzbek milliy matolaridan foydalangan holda har kuni kiyiladigan liboslarni joriy etishga alohida eʼtibor qaratilmoqda. Xursandmanki, bugungi kunda ayollarimizda zamonaviy tarzda tikilgan milliy liboslarimizni kiyish yana urfga aylandi.

Milliy va zamonaviy liboslarni qogʼozga tushirishdan tashqari, ularni bichishga ham harakat qilaman. Har bir sohada rivojlanish uchun mukamallik qoʼl keladi. Shu bois tikuvchilik toʼgaragiga ham qatnashaman.

Oʼylaymanki, karantin davri oʼz ustimizda koʼproq ishlash uchun qulay sharoitni ham yuzaga keltirdi, qolaversa, eng ahamiyatli jihati, oilam bagʼrida boʼlib, har kuni ota-onam va yaqinlarim bilan dasturxon boshida maroq bilan suhbatlashib, fikrlar almashdik va bolalar bilan turli oʼyinlarni davom ettirdik. Shuningdek, taomlar hamda turli xil shirinliklar pishirish bilan mashgʼul boʼldim. Oila aʼzolarimning duosini oldim. Bu esa men uchun juda muhimdir.

Innovatsion rivojlanish vazirligiga qarashli “XXI asr texnologiyalari” jurnali tomonidan oʼtkazilgan tanlov mening oʼzimga boʼlgan ishonchimni yanada oshirdi. Ularga ana shunday oʼtkazilgan tanlov uchun oʼz tashakkurimni izhor etaman.

O’zbekiston va Hindiston o’rtasidagi innovatsiyalar sohasidagi hamkorlik istiqbollari muhokama qilindi

O’zbekistonning Hindistondagi elchisi Dilshod Axatov Hindistonning Routern.com kompaniyasi rahbari Chandrakant Sharma bilan uchrashdi.

Tadbirda O’zbekistonning turli sohalarida innovatsion echimlarni faol tatbiq etish, ushbu yo’nalishda qo’shma loyihalarni amalga oshirish va startap ekotizimini qo’llab-quvvatlash bo’yicha olib borilayotgan izchil ishlar haqida so’z yuritildi. Tomonlar, shuningdek, yaqin kelajakda rejalashtirilgan qo’shma loyihalarni tahlil qildilar va hamkorlikning ustuvor yo’nalishlarini belgilab oldilar.

Charlz Sharma dunyoda koronavirus pandemiyasi sababli mavjud vaziyatda raqamli echimlar, bilim va zamonaviy axborot texnologiyalariga bo’lgan ehtiyoj dinamik ravishda o’sib borayotganini ta’kidladi. Shu munosabat bilan tomonlar onlayn savdo maydonchalari orqali sayyohlik, masofaviy o’qitish, tadbirkorlar, shu jumladan, O’zbekiston hunarmandlari tomonidan ishlab chiqarilayotgan mahsulotlarni keng targ’ib qilish kabi masalalar bo’yicha fikr almashdilar.

Ta’kidlash joizki, Routern.com vakillari 2018-2019 yillarda O’zbekistonda bo’lib, mamlakatimizning tegishli vazirlik va idoralari bilan muzokaralar olib borishdi. 2019 yil oktyabr oyida Chandrakant Sharma Hindistonda O’zbekiston Innovatsion rivojlanish vazirligining faxriy elchisi etib tayinlandi.

O’qituvchiga hurmat

1-oktyabr kuni O’qituvchilar va murabbiylar kuni munosabati bilan Toshkent shahar hokimligi, Toshkent shahar prokuraturasi va O’zbekiston Respublikasi Innovatsion rivojlanish vazirligi, shuningdek, O’zbekiston yoshlar ittifoqi Toshkent shahar Kengashi tomonidan “O’qituvchilarga hurmat” aksiyasi tashkil etildi.

Innovatsion rivojlanish vazirining o’rinbosari Olimjon To’ychiev tadbirda so’zga chiqib, o’qituvchilarni tabrikladi. U har bir davlatning burchi, uning jamiyat oldidagi mas’uliyati yosh avlod tarbiyasiga bag’ishlangan o’qituvchilarning ko’magi ekanligini ta’kidladi.

Hozirgi kunda Toshkent shahridagi 317 ta umumta’lim maktablarida 23354 ta o’qituvchilar, 575 ta o’rta maxsus kasb-hunar ta’limi muassasalarida 8754 ta o’qituvchilar, 44 ta oliy o’quv yurtlarida (11 ta Toshkentdagi xorijiy universitetlarning 10 ta filiali) ish olib bormoqdalar. Ular 1 000 000 dan ortiq o’quvchilar va talabalarga dars berishadi.

Tadbir davomida 40 dan ortiq fidoyi, tashabbuskor o’qituvchilar taqdirlandi.